Aalilakattu ആലിലക്കാറ്റ്

 ചുവന്ന പരവതാനിയിലുടെ ഒഴുകി നീങ്ങുന്ന രാജകുമാരിയായ് വിഹരിച്ചിരുന്ന ഒരു കാലമുണ്ടായിരുന്നു...ആരാധകര്‍ക്ക് പിടികൊടുക്കാത്ത ഒരു പൂത്തുമ്പിയായ് പാറി പറന്ന് വര്‍ണ്ണസുന്ദരമായ സ്വപ്നക്കൂട്ടില്‍ ചമയങ്ങള്‍ ഇല്ലാതെ കഴിഞ്ഞിരുന്ന ഒരു കൊച്ചു വാനമ്പാടി...🌼

 പുലർക്കാല സ്വപ്നങ്ങളിലൊക്കെയും വാകപ്പൂക്കൾ വാരി വിതറിയ പാതയോരങ്ങൾ കാണുമായിരുന്നു.. പൂക്കൾ കൊണ്ട് തീർത്ത പരവതാനി പോലെ.. ഈ വഴിയോരങ്ങളിൽ പുഷ്പിച്ച പ്രണയങ്ങളെ  പൂക്കൾ വാരി വിതറി വരവേൽക്കുന്നതാവാം ഈ വാകമരങ്ങൾ.. ഇന്ന് ഈ കാറ്റിനും പൂക്കൾക്കും ചോരയുടെ ഗന്ധമോ....

 ആകാശം കാണാതെ സൂക്ഷിച്ച മയിൽ‌പീലി കുഞ്ഞുങ്ങൾ വളർന്നു പെറ്റുപെരുകി നിറം മങ്ങി നരച്ചു മെലിഞ്ഞു ഒരു ഈർക്കിൽ പരുവമായി... നീലകണ്ണുകൾ തിളക്കം നഷ്ടപ്പെട്ടു തവിട്ടു നിറത്തിൽ മങ്ങിയ വെളിച്ചത്തിലൂടെ അലഞ്ഞു..., പുതിയ ആകാശം തേടി... പുസ്തകതാളിൽ ഒളിപ്പിക്കാതെ ആകാശം കണ്ടു വളരട്ടെ ഓരോ  മയിൽ‌പീലികുഞ്ഞുങ്ങളും....

 🌹 പ്രണയവും പ്രണയാനുഭവങ്ങളും പലർക്കും പലതാണ്... ഒരാളുടെ മാത്രം വീക്ഷണത്തിൽ നിന്നും പറയുക അസാധ്യവുമാണ്....നിർവചിക്കുവാൻ മാത്രം ആളുമല്ല.. പ്രണയിക്കുവാൻ മാത്രം ഒരു ദിനമൊന്നില്ല.. പ്രണയം ആഘോഷിക്കാനായി ഒരു ദിനം... പുറമെ അപൂർണ്ണമെന്ന് തോന്നുന്ന പല പ്രണയങ്ങളും പൂർണ്ണവും പൂർണ്ണമെന്ന് തോന്നുന്ന പല പ്രണയങ്ങളും അപൂർണ്ണവുമാണ്... സ്വന്തമാകുന്നത്തോടെ പല പ്രണയങ്ങളും മരിക്കുന്നു... ചിലർക്ക് പ്രണയം വീഞ്ഞും ചിലർക്ക് ഭ്രാന്തും  ചിലർക്ക് തമാശയും നേരംപോക്കും ചിലർക്ക് ചതിയും മറ്റു ചിലർക്ക് ചോരയുമാണ്... ചിലർ പ്രണയിച്ചു കൊണ്ടിരിക്കുന്നവർ... പ്രണയിക്കപ്പെടാൻ ആഗ്രഹിക്കുന്നവർ.. തയ്യാറെടുക്കുന്നവർ...  പ്രണയച്ചതിയിൽ അകപ്പെട്ടുപ്പോയവർ..പ്രണയം സാഫലമായവർ... ആഗ്രഹിച്ചിട്ടും സാഹചര്യങ്ങളുടെ സമ്മർദ്ദങ്ങൾക്ക് വിധേയമായി പ്രണയം നഷ്ടപ്പെട്ടവർ...പ്രണയം തുറന്ന് പറയാൻ പറ്റാതെപോയവർ...പ്രണയത്തിന്റെ പേരിൽ ഉറ്റവരേയും ഉടയവരേയും കണ്ണീരിലാഴ്ത്തിയവർ... പ്രണയത്തിലൂടെ തെരെഞ്ഞെടുത്ത ജീവിതത്തിനാൽ  കണ്ണീരും കിനാവുമായി ജീവിക്കുന്നവർ...പ്രണയത്തിനു പല മുഖങ്ങളാണ്.. യഥാർത്ഥ പ്രണയത്തിനു ഭാഷയുടെയോ കൂടിച്ചേരലുകളുടെയോ ആവശ്യമുണ്ടോ...

തേനും തേനീച്ചയും....എന്റെ പേരിനു കാരണവും ഈ തേനീച്ചയാണ്...അതുകൊണ്ട് എനിക്കിവളെ വലിയ ഇഷ്ടമാണ്....വിളിക്കുമ്പോള്‍ നാവില്‍ മാധുര്യമേറും ഇഷ്ടത്തോടെ അല്ലെങ്കില്‍ കൂടി...

ഏറ്റവും ഇഷ്ടമുള്ള ഒരു കാഴ്ചകളില്‍ ഒന്നാണ് മഴയും മഴയില്‍ കുതിര്‍ന്ന പ്രകൃതിയും..മഴയില്‍ കുളിച്ച പൂക്കള്‍ക്ക് സൗന്ദര്യം കൂടുതലാണ്...